Hugmyndir að göngu- og hlaupaleiðum á náttúrustígum
Stígar í grennd við þéttbýli sem henta fyrir stuttar göngur og hlaup í náttúrunni.
Hér eru ekki upplýsingar um malbikaða stíga, þær er að finna á heimasíðum sveitarfélaga.
Ekki er heldur fjallað um lengri leiðir svo sem á hálendinu, upplýsingar um þær er að finna hjá ferðafélögum.
Erfiðleikastig
Leiðirnar eru af þremur erfiðleikastigum:
- 1 skór. Léttar og stuttar leiðir, 3-6 km, ýmist á jafnsléttu eða í fjallendi. Henta allri fjölskyldunni.
- 2 skór. Miðlungslangar dagleiðir á láglendi, 6-15 km og hækkun 100-300 m. Þarf að vera í nokkuð góðu formi.
- 3 skór. Miðlungslangar dagleiðir í fjallendi, 6-15 km og hækkun meiri en 300 m. Þarf að vera í góðri þjálfun.
Veldu leið við hæfi þitt og eða samferðafólksins, þú ert alltaf á ferð á eigin ábyrgð.
Búnaður
Öruggast er að hafa alltaf vel hlaðinn síma meðferðis og geyma hann í plastpoka ef rignir. Einnig að láta einhvern vita af göngu- eða hlaupaáætlun.
Í lengri ferðum borgar sig að hafa aukaföt og/eða álpoka, nesti, eitthvað að drekka og jafnvel orkugel eða suðusúkkulaði.
Leið mánaðarins
Hólminn í Elliðaárdal
Stutt og létt ganga sem hentar allri fjölskyldunni, hentar líka vel til náttúruhlaupa. Gott skjól í skóginum, fuglalíf og kyrrð.
